شفت صدام اني بعالم الرؤيا مخذول او ذليل او حاير ابمره
في اسفل درك محتاطه بيه النار واكف منتظر للمحكمة الكبره
امر وتعس كلتله كون من هل الحال وهذي عاقبة افعالك القذره
من الباري طلبنه مانريد اتموت يفتر بالمدن والموت ينتظره
جاوبني ابغضب قال الوكت دولاب ابد ماحسبت دولابه ايفره
زهتلي ايام راحت وي مهب الريح تلكيت الوكت بفعالي المره
شارت كربله كتله اضنه اوياك لو شارت يتامه اوشارت الاسرة
تدري ابكربلا اشكد حطمت ظلام ومن حسين كامل ماخذت عبرة
رد ليه او سألني عجل اهلك وين كتله السكن من اربيل للبصره
شيعي انته يكلي او حاقد اعلينه متوهم قلتله اوغلط متصوره
توحدنه ابغيابك كنه متفرقين وانت اسباب هاي التفرقه الكشره
او علمنه التسامح حيدر الكرار من نوله عدونه او بيدنه انظفره
كتله اسوتنلنه 17 تموز احزان او مأسي دوم متكدره
اودقيت الطبول الحرب وي ايران وانه اتكول طمب الصغره والكبره
او طبيت الكويت ابلا عذر مشروع او زناكيل الخلق سويته فقره
زناكيل الخلق وصبحنه مطلوبين او تفرهد بيتنه او صاوغت بيه مطره
مطره سلمتنه بيد الامريكان بس رايتنه لازم تبقه منتصره
احنه اولاد حيدر والشهيد حسين تعلمنه الصبر من حيدر ابصبه
تجرعنه الوكت رغم المرار البيه بس منك خاصنه اولله انشكره
قال اني ارسمت مجانية التعليم او ثابت النهج من عندي والفركه
قائد حمله اني او عزت النائب او عزت كان لايكتب ولا يقره
عزت بالقواعد يرفع المنصوب والمرفوع عزت بيده ايجره
كتله اول فشلكم هذا بالسبعين ومنكم كل شريف اختاض وتبره
اممت النفط قال اني بالسبعين وهذا اول قرار الصدر للثوره
كتله النفط بس نسمع فلاشفناه وندري بالنفط على الاردن اتصدره
ثلثين النفط للخال وابن اخته او للولاد ثلث اعليه اتخسره
ورباح الصناعة تبني بيها اقصور وحفله ابكل قصر ليليه او سهره
كال اني اعتذر منكم اريد اليوم واليعتذر لازم ينقبل عذره
كتله اشتعتذر من هل الجرايم هاي ومقابر جماعيه عدنه ابكثره
وياهي الي ابنها ايهون وتعذرك وياوالد اليرضه او حسرته ابصدره
وياطفل اليتيم اليرضه هسه عليك ومايندل ابوه ابياكتر كبره
طم روحك يعار وقبللها الموت ولا اسمك بعد للوادم اتظهره
ونقلك خبر والناس كلها اتكول والله الجابتك صدام مو حره
لون الجابتك عده شرف وحساس اكيد من الشرف كان املكت ذره
او لو ما ابن زنا صدكني ماسويت شعب الي يخدمك بيدك ادمره
